Магiлеў

28 верасня ў Магілёве адбылося ўрачыстае адкрыццё маста праз раку Дубравенку. Паводле мэра Магілёва Віктара Шорыкава, новая транспартная лінія дасць новае жыццё адной з найстарэйшых вуліцаў горада – Віленскай, разгрузіць транспартны паток у цэнтры і палепшыць экалагічную сітуацыю.

Праз новы мост і вуліцу Віленскую будуць ездзіць тры аўтобусы — № 5, № 23 і № 41, маршрутныя таксі № 23, № 26 і № 44. А ў недалёкай будучыні гарадскія ўлады збіраюцца пусціць па рэканструяванай вуліцы тралейбусныя маршруты. У сённяшніх планах мэра Магілёва Віктара Шорыкава не проста вызваленне цэнтру горада ад лішняга транспарту, а пераважны пераход на электратранспарт.

Праўда, да апошняй задумы Шорыкава паспелі прычапіцца недабразычліўцы магілёўскага горадакіраўніка. Аказваецца, некалькі год таму, выступаючы ў Магілёўскім тэхнічным універсітэце, мэр наракаў “на тралейбусы, з-за якіх вуліцы абвешаныя неэстэтычнымі правадамі з электрамагнітным выпраменьваннем”. Тады Шорыкаў казаў, што не будзе развіваць гэты від транспарту. А некаторыя магілёўскія карыстальнікі інтэрнэту ўвогуле называюць будаўніцтва маста “разбурэннем унікальнага гарадскога ландшафту”.