Магiлеў

Пісьмовы адзказ чыноўнікаў на сваю заяву дэмакраты атрымалі 8 кастрычніка. У лісце за подпісам намесніка старшыні Магілёўскага гарвыканкаму Фёдара Міхеенкі гаворыцца, што гарвыканкам не можа прыняць заяву да разгляду, бо ў ёй не прадугледжаны меры бяспекі падчас правядзення акцыі.

Старшыня Магілёўскай абласной арганізацыі Беларускай сацыял-дэмакратычнай партыі “Грамада” Юрый Фамін называе адказ чыноўнікаў адпіскай: “Цяпер можна падаваць у суд, бо гарвыканкам не прыняў нашую заяву да разгляду, хоць згодна закону абавязаны быў гэта зрабіць”. Паводле Фаміна, дэмакраты гатовы былі нават самі аплаціць паслугі па ахове правапарадку падчас пікетаў, але адпаведныя дамовы яны збіраліся заключыць пасля атрымання адказу гарвыканкаму. І ў заяве гэта было пазначана.

Чатыры пікеты павінны былі адбыцца ў Магілёве напярэдадні Еўрапейскага маршу — 13 кастрычніка. Мэтай акцыі было прыцягнуць увагу грамадскасці да магчымасцяў і ўмоваў больш шчыльнага супрацоўніцтва Беларусі з Еўрасаюзам. Заяву аб правядзенні пікетаў падпісалі лідэры Магілёўскай абласной кааліцыі дэмакратычных сіл.