Магiлеў

Магілёўшчына: сёньня новыя ператрусы

Сёньня пасьля дзевятай гадзіны ў рэдакцыю горацкай недзяржаўнай газэты “Ўзгорак” прыйшлі супрацоўнікі міліцыі. Пра гэта рэдактар выданьня Эдуард Брокараў пасьпеў паведаміць карэспандэнту “Свабоды”. Цяпер тэлефон спадара Брокарава не адказвае.

ПАДЗЕІ ПАПЯРЭДНЯГА ДНЯ

21.30 “Для ператрусу дзьверы рэзалі аўтагенам”

19.12 IFJ: сытуацыя журналістаў у Беларусі ўсё горшая

18.56 “Рэпарцёры бязь межаў” шакаваныя падзеямі ў Беларусі

18.35  Сяргей Скрабец: “Працягваецца запалохваньне грамадзтва вось такімі акцыямі Камітэту дзяржбясьпекі. А так у нас даўно няма свабод, гарантаваных нам Канстытуцыяй: свабоды слова, друку і гэтак далей. Пра гэта ж сьведчаць і тыя затрыманьні і зьбіцьцё палітыкаў, моладзі, актывістаў, якія адбываліся 25 сакавіка. І гэта вельмі дакладна характарызуе ўладу, якая ня пойдзе ні на якія саступкі. Ня будзе свабодных выбараў, ня будзе палёгкі адносна разьвіцьця дэмакратычнага руху. Гэта вельмі сумна, бо з гэтага вынікае, што Казуліну давядзецца адседзець свае тры з паловай гады. Гэта ж тычыцца і іншых палітзьняволеных, у тым ліку новых, якія атрымалі суткі. Я лічу, што ўсё гэта адбываецца толькі таму, што Эўразьвяз ідзе на сталыя кантакты зь сёньняшняй уладай. Калі б яны занялі пазыцыю, якую займае ЗША, то гэтага не адбылося б”.

18.25 Людміла Гразнова: “Улада гэта робіць пры падтрымцы Расеі. Улада ўжо не трымае сябе ў руках. Яна толькі правакуе пагаршэньне сытуацыі ў краіне. Мабыць, санкцыі, накладзеныя на кампанію “Белнафтахім”, так балюча ўдарылі, што ўлада ня мае іншага выйсьця, як арыштоўваць і зьбіваць людзей, а таксама рабіць ператрусы ў кватэрах журналістаў. Яшчэ адно падазрэньне, што на такія бандыцкія мэтады пайшла ня толькі беларуская ўлада. Выконваецца сцэнар па дэстабілізацыі становішча ў краіне, каб на гэтым тле адштурхнуць ад улады Лукашэнку і перадаць яе таму, хто будзе больш ляяльны і марыянэтачны ў руках Расеі”.

18.12 Кіраўнік Эўрапарлямэнту асудзіў дзеяньні беларускіх уладаў

18.02 МЗС: гэта нелегальныя журналісты

18.00 Намесьнік старшыні Беларускай асацыяцыі журналістаў Аляксандар Старыкевіч пракамэнтаваў масавыя ператрусы на кватэрах журналістаў: “Нічога дзіўнага не адбываецца. Сродкі масавай інфармацыі за ўвесь пэрыяд праўленьня Лукашэнкі цярпелі больш, чым хто іншы. І таму, калі апошнім часам была нейкая адліга, як пра гэта пісалі некаторыя аналітыкі, у сэнсе палітычным, вызвалялі некаторых палітвязьняў, больш-менш спакойна паставіліся да Эўрапейскага і Сацыяльнага маршаў, то незалежных мэдыяў гэта ніяк ня тычылася. І таму цяпер проста чарговы наезд, бо гэтая ўлада несумяшчальная зь незалежнымі мэдыямі. Яна не жадае зь іх існаваньнем прымірыцца. Пакуль загад на канчатковую ліквідацыю не аддадзены, але тое, каб максымальна ўскладніць жыцьцё - такая задача ёсьць, у гэтым сумневу няма”.

17.30 Ператрус у Магілёве (фотарэпартаж)

17.30 Пасьля ператрусу ў офісе "Радыё Рацыя" (фотарэпартаж)

17.12 Ператрусы і канфіскацыі адбыліся ва ўсіх рэгіёнах

16.45 У Віцебску, у кватэры, дзе прапісаны Алег Баршчэўскі і яго бацькі, супрацоўнікі КДБ праводзяць ператрус. Паводле жонкі спадара Баршчэўскага Вольгі Карач, у кватэру нікога не пускаюць. У якасьці панятых выкарысталі салдатаў вайсковай часткі. Тэлефоны бацькоў спадара Баршчэўскага дагэтуль не адказваюць. Сам Алег Баршчэўскі знаходзіцца па-за межамі кватэры. Сябра БХК Павал Левінаў прыехаў на кватэру Баршчэўскіх і папрасіў, каб яго ўзялі ў якасьці панятога. Паводле Вольгі Карач, міліцыянт Скарыновіч абвінаваціў спадара Левінава ў тым, што ён нібыта нецэнзурна лаяўся. Спадара Левінава адвезьлі ў Кастрычніцкі РАУС Віцебску.