Магiлеў

ФІНЬКЕВІЧ ПАДАЎ КАСАЦЫЙНУЮ СКАРГУ НА РАШЭННЕ СУДА

Маладафронтавец Артур Фінькевіч у касацыйнай скарзе поўнасцю адмаўляе сваю віну, прызнанне, зробленае ім падчас суда, і лічыць асуджэнне незаконным. Свае дзеянні на судзе ён тлумачыць тым, што ў той момант быў у дрэнным фізічным і псіхалагічным стане і не мог адэкватна рэагаваць на ход працэсу, бо знаходзіўся пад уздзеяннем лекаў.

Касацыйная скарга павінна быць разгледжана Магілёўскім абласным судом у месячны тэрмін. Увесь гэты час Артур Фінькевіч будзе знаходзіцца ў следчым ізалятары.

Нагадаем, 20 снежня Фінькевіч, адзін з лідэраў незарэгістраванай арганізацыі "Малады фронт", быў прыгавораны да 1,5 года пазбаўлення волі з адбываннем пакарання ў калоніі агульнага рэжыму. Такое рашэнне вынес суд Кастрычніцкага раёна Магілёва, прызнаўшы А.Фінькевіча вінаватым ва ўчыненні злачынства, прадугледжанага арт. 415 Крымінальнага кодэкса (ухіленне ад адбывання пакарання ў выглядзе абмежавання волі).